આજથી દિવાળીના પાંચ દિવસના મહાપર્વનો પ્રારંભ: ધનતેરસની ધૂમ

આજથી દિવાળીના પાંચ દિવસના મહાપર્વનો પ્રારંભ: ધનતેરસની ધૂમ, બજારોમાં 'વોકલ ફોર લોકલ'નો માહોલ

સમગ્ર દેશમાં આજે ધનતેરસની ઉત્સાહભેર ઉજવણી સાથે પાંચ દિવસના દીપોત્સવ – દિવાળીના મહાપર્વનો શુભારંભ થઈ ગયો છે. ધન અને સમૃદ્ધિના આ પર્વને લઈને દેશભરના બજારોમાં ખરીદી માટે ભારે ભીડ જોવા મળી રહી છે, જેમાં પ્રધાનમંત્રી નરેન્દ્ર મોદીના 'વોકલ ફોર લોકલ' અભિયાનની અસર સ્પષ્ટપણે દેખાઈ રહી છે.

આરોગ્ય અને સમૃદ્ધિનો દિવસ ધાર્મિક માન્યતા અનુસાર, ધનતેરસના આજના પવિત્ર દિવસે સમુદ્ર મંથન દરમિયાન ભગવાન ધન્વન્તરી અમૃત કળશ લઈને પ્રગટ થયા હતા. આ જ કારણથી આ દિવસને સ્વાસ્થ્ય, આરોગ્ય અને સમૃદ્ધિનું પ્રતિક માનવામાં આવે છે. લોકો આ દિવસે ધાતુ, સોના-ચાંદીની ખરીદી કરીને શુભ અને ધન-વૃદ્ધિની કામના કરે છે.

બજારોમાં ઉમટી ભીડ, 'લોકલ' વસ્તુઓની માંગ ધનતેરસના શુભ અવસર પર ખરીદીના શુભ મુહૂર્તમાં દેશભરના બજારો ગ્રાહકોની ભીડથી ઉભરાઈ ગયા છે. ખાસ કરીને સ્વદેશી અને સ્થાનિક સ્તરે બનેલી વસ્તુઓની માંગમાં નોંધપાત્ર વધારો થયો છે. પ્રધાનમંત્રી મોદીના 'વોકલ ફોર લોકલ'ના આહ્વાનને પગલે, લોકો ચાઈનીઝ વસ્તુઓ કરતાં માટીના દીવા, સ્થાનિક કારીગરો દ્વારા બનાવેલી સજાવટની વસ્તુઓ અને ભારતીય બનાવટની ચીજવસ્તુઓ ખરીદવાને પ્રાધાન્ય આપી રહ્યા છે.

આ સાથે, હવે આગામી દિવસોમાં કાળી ચૌદશ, દિવાળી, બેસતું વર્ષ અને ભાઈબીજના તહેવારોની ઉજવણીનો માહોલ જામશે.