યુક્રેન સાથેના યુદ્ધમાં રશિયા નિષ્ફળ થઈ રહ્યું છે: અમેરિકી રાષ્ટ્રપતિ

નાટો સમિટમાં અમેરિકી રાષ્ટ્રપતિ જો બાઈડેન કહ્યું કે, રશિયા યુક્રેન સાથેના યુદ્ધમાં નિષ્ફળ જઈ રહ્યું છે. આ સાથે જો બાઈડેને યુક્રેનને હવાઈ સંરક્ષણ સાધનોની સપ્લાયની જાહેરાત કરતી વખતે નાટો દેશોને કોઈ ભૂલ ન કરવા જણાવ્યું હતું.

અમેરિકી રાષ્ટ્રપતિ જો બાઈડેન યુક્રેનને એર ડિફેન્સ સિસ્ટમ આપવાની જાહેરાત કરી છે. તેમણે કહ્યું કે રશિયા આ યુદ્ધમાં નિષ્ફળ રહ્યું છે. નાટોની 75મી વર્ષગાંઠ નિમિત્તે આયોજિત સમિટમાં જો બાઈડેન બોલી રહ્યા હતા. આ દરમિયાન તેમણે સભ્ય દેશોના નેતાઓનું સ્વાગત કર્યું અને કહ્યું કે અમેરિકા, જર્મની, નેધરલેન્ડ, રોમાનિયા અને ઈટાલી યુક્રેનને પાંચ વધારાની વ્યૂહાત્મક એર-ડિફેન્સ સિસ્ટમ્સ આપશે. તેમણે કહ્યું કે આગામી મહિનાઓમાં અમેરિકા અને તેના ભાગીદાર દેશો યુક્રેનને ડઝનેક વધારાની વ્યૂહાત્મક હવાઈ સંરક્ષણ પ્રણાલીઓ પ્રદાન કરશે.

જો બાઈડેન કહ્યું કે, આ સંરક્ષણ પ્રણાલીઓ પહોંચાડ્યા પછી અમે સુનિશ્ચિત કરીશું કે યુક્રેન ફ્રન્ટ લાઇન પર રહે.  બાઈડેન જણાવ્યું હતું કે, યુક્રેનને આગામી વર્ષમાં સેંકડો વધારાના ઇન્ટરસેપ્ટર્સ પ્રાપ્ત થશે, જે યુક્રેનિયન શહેરોને રશિયન મિસાઇલોથી સુરક્ષિત કરશે. તે યુક્રેનિયન સૈનિકોને તેમના મોરચા પર હવાઈ હુમલાનો સામનો કરવામાં પણ મદદ કરશે.

જો બાઈડેન પોતાના સંબોધનમાં કહ્યું કે યુક્રેન પુતિનને રોકશે અને સફળ થશે. જ્યારે રશિયાએ હુમલો કર્યો ત્યારે કહ્યું હતું કે, કિવ બે દિવસમાં જીતી લેવામાં આવશે, પરંતુ તેમાં બે વર્ષથી વધુ સમય થઈ ગયો છે. આ સમયગાળા દરમિયાન રશિયાના સાડા ત્રણ લાખથી વધુ સૈનિકો માર્યા ગયા છે અથવા ઘાયલ થયા છે. એટલું જ નહીં લગભગ 10 લાખ રશિયનોએ સુરક્ષિત ભવિષ્ય માટે દેશ છોડી દીધો છે. તેમણે કહ્યું કે યુક્રેન રશિયન રાષ્ટ્રપતિ વ્લાદિમીર પુતિનને રોકવામાં સફળ રહેશે.