દેશમાં પ્રથમવાર રેલવે દ્વારા વલસાડ ખાતે માત્ર 20 દિવસમાં બનશે રેલવે ઓવરબ્રિજ 

ભારત દેશમાં પ્રથમવાર રેલવે દ્વારા વલસાડ ખાતે નવી ટેક્નોલોજીનો ઉપયોગ કરી 20 દિવસમાં રેલવે ઓવરબ્રિજ તૈયાર કરવામાં આવી રહ્યો છે. 5 મહિનાનું આ કામ રેલવેની કન્સ્ટ્રકશન એજન્સી ઇસ્કોન દ્વારા ગણતરીના દિવસમાં જ પૂર્ણ કરી દેવાશે. પ્રતિ દિન 20 હજાર જેટલા વાહનોની અવરજવર સાથે 24 કલાક ટ્રાફિકથી ધમધમતા જિલ્લા મથકના આ રેલવે બ્રિજને ઝડપથી તૈયાર કરવા રેલવેની પ્રોજેક્ટ ટીમ રાત દિવસ કામે લાગી છે. 75 ટકા કામગીરી પૂર્ણ કરી દેવાઈ છે. 22 જૂન સુધીમાં આ બ્રિજ તૈયાર કરવા રેલવેનો લક્ષ્યાંક છે. માત્ર 20 દિવસ માટે બંધ કરાયેલા આ બ્રિજનું કામ આટલી જ સમય મર્યાદામાં પૂર્ણ કરવાનો પડકાર રેલવે ડીએફસીસી અને કન્સટ્રકશન એજન્સી ઇસ્કોન સામે હતો.

પરંપરાગત બાંધકામથી જો કામ કરવામાં આવે તો 5 મહિના લાગી શકે તેમ હતું પરંતુ પ્રોજેકટ ટીમે નવો ઉકેલ શોધી 20 દિવસમાં જ આ કામ પૂર્ણ કરવા નવી પધ્ધતિનો ઉપયોગ કર્યો છે. જેમાં સ્કેવર આકારની પ્રિકાસ્ટ ક્રોંક્રિટ હેવી ફ્રેઇમ તૈયાર કરી છે. રેલવે સૂત્રોના જણાવ્યા મુજબ આ પ્રિકાસ્ટ કોંક્રિટ હેવી સ્ટીલ ફ્રેઇમ માત્ર 10 દિવસમાં જ ફીટ કરી 20 દિવસમાં જ બ્રિજ તૈયાર કરવાના ધ્યેય સાથે ભારતમાં પ્રથમ વાર વલસાડ રેલવે બ્રિજના બાંધકામમાં નવા અધ્યાયનું નિર્માણ કરાઇ રહ્યું છે.