રાષ્ટ્રપતિની મ્હોર બાદ વકફ બિલ કાયદો બન્યો,કેન્દ્ર અમલીકરણની નક્કી કરશે તારીખ

રાષ્ટ્રપતિ દ્રૌપદી મુર્મુએ શનિવારે મોડી રાત્રે વક્ફ (સુધારા) બિલને પોતાની મંજૂરી આપી દીધી. સરકારે નવા કાયદા અંગે ગેઝેટ નોટિફિકેશન બહાર પાડ્યું. હવે કેન્દ્ર સરકાર નવા કાયદાના અમલીકરણની તારીખ અંગે એક અલગ સૂચના બહાર પાડશે. 

ઉલ્લેખનીય છે કે, 2  એપ્રિલે લોકસભામાં અને 3 એપ્રિલે રાજ્યસભામાં 12 કલાકની ચર્ચા બાદ બિલ (કાયદો) પસાર થયું.નવા કાયદા અંગે સુપ્રીમ કોર્ટમાં અત્યાર સુધીમાં છ અરજીઓ દાખલ કરવામાં આવી છે. આ નવી અરજી કેરળના સુન્ની મુસ્લિમ સંગઠન કેરળ જમિયાતુલ ઉલેમા દ્વારા દાખલ કરવામાં આવી છે. તે જ સમયે, ઓલ ઈન્ડિયા મુસ્લિમ પર્સનલ લો બોર્ડે 11 એપ્રિલથી દેશભરમાં વિરોધ પ્રદર્શન કરવાની જાહેરાત કરી છે.

આ પહેલા કોંગ્રેસના સાંસદ મોહમ્મદ જાવેદ, AIMIMના વડા અસદુદ્દીન ઓવૈસી, AAP ધારાસભ્ય અમાનતુલ્લાહ ખાન, નાગરિક અધિકાર સંગઠન એસોસિએશન ફોર પ્રોટેક્શન ઓફ સિવિલ રાઈટ્સ અને જમિયત ઉલેમા-એ-હિંદના પ્રમુખ મૌલાના અરશદ મદનીએ અલગ-અલગ અરજીઓ દાખલ કરી હતી.

આ અંગે કેન્દ્રીય મંત્રી કિરેન રિજિજુએ કહ્યું કે આ કાયદાનો હેતુ વકફ મિલકતોમાં ભેદભાવ, દુરુપયોગ અને અતિક્રમણને રોકવાનો છે. રાજ્યસભામાં આ બિલ (કાયદો) ને 128 સભ્યોએ ટેકો આપ્યો હતો, જ્યારે 95 સભ્યોએ તેનો વિરોધ કર્યો હતો. આ બિલ 2 એપ્રિલના રોજ મધ્યરાત્રિએ લોકસભામાં પસાર થયું હતું. આ સમયગાળા દરમિયાન, 288 સાંસદોએ સમર્થનમાં મતદાન કર્યું અને 232 સાંસદોએ વિરોધમાં મતદાન કર્યું.