મુખ્યમંત્રીએ ફોટો જર્નાલિસ્ટ એશોસીએશન દ્વારા આયોજિત ‘ફોટો પ્રદર્શન’ને ખુલ્લું મુક્યું

વર્લ્ડ ફોટોગ્રાફી ડે ની ઉજવણીના ઉપલક્ષ્યમાં અમદાવાદની રવિશંકર આર્ટ ગેલેરીમાં ફોટો જર્નાલીસ્ટ એસોશીયેસન અમદાવાદ દ્વારા આયોજીત ફોટો પ્રદર્શનને મુખ્યમંત્રી ભૂપેન્દ્ર પટેલે ખુલ્લુ મુક્યું હતું. આ  ફોટો પ્રદર્શનમાં ઉજવણીના ઉપલક્ષ્યમાં ફોટો જર્નાલિસ્ટ એસોશીએશન આયોજિત ‘ફોટો પ્રદર્શન’માં ૧૬૦ જેટલી સુંદર અને અલભ્ય તસ્વીરો પ્રદર્શિત કરવામાં આવી છે. મુખ્યમંત્રીએ આ તસ્વીરો અત્યંત રસપૂર્વક નિહાળી હતી. કેમેરાના માધ્યમથી કચકડે કંડારાયેલી અનેક તસ્વીરો યાદગાર ક્ષણોને મુખ્યમંત્રીએ બિરદાવીને તસ્વીરકારોને અભિનંદન પણ આપ્યા હતા. કેમેરામાં કંડારાયેલી બેનમૂન તસ્વીરો આ ફોટો પ્રદર્શનમાં પ્રદર્શિત કરાઈ છે. પ્રાકૃતિક સૌંદર્ય, રીત-રિવાજ તથા માનવીય સંવેદના ઉપરાંત  કોરોના કાળમાં સરકાર દ્વારા ઉપલબ્ધ કરાયેલી ટેસ્ટીંગથી માંડી અન્ય સુવિધાઓને  ઉજાગર કરતી વિવિધ બાબતોને  ફોટોકર્મીઓ દ્વારા  કેમેરામાં કંડારવામાં આવી છે તે પૈકીની શ્રેષ્ઠ તસ્વીરો આ પ્રદર્શનમાં પ્રદર્શિત થઇ છે

આ ફોટો પ્રદર્શન પ્રારંભ પ્રસંગે રાજ્યસભાના સાંસદ નરહરિ અમીન, અમદાવાદ મહાનગરપાલિકાની સ્ટેન્ડિંગ કમિટીના ચેરમેન હિતેષ બારોટ, ભાજપાના શહેર પ્રમુખ અમીતભાઈ શાહ, ધારાસભ્ય રાકેશભાઈ શાહ વગેરે ઉપસ્થિત રહ્યા હતા.  

આ પ્રદર્શન જાહેર જનતા માટે તા ૨૮ ઓગષ્ટ સુધી સવારે ૧૧ થી રાત્રે ૮ સુધી ખુલ્લું રહેશે.