મુખ્યમંત્રી કિસાન સહાય યોજનાને વર્ષ 2021 માટે મળી મંજૂરી, 53 લાખથી વધુ ખેડૂતોને મળશે યોજનાનો લાભ

મુખ્યમંત્રી વિજયભાઇ રૂપાણીએ ખેડૂતોને ખરીફ ઋતુમાં કુદરતી આપત્તિથી થતાં પાક નુક્સાન સામે સહાયરૂપ થવા મુખ્યમંત્રી કિસાન સહાય યોજનાને વર્ષ 2021 માટે મંજૂરી આપી છે. આ યોજનામાં રાજ્યના નાના-મોટા તેમજ સિમાંત બધા જ ખેડૂતોને આવરી લેવામાં આવ્યા છે. રાજ્યના અંદાજે 53 લાખથી વધુ ખેડૂતોને આ યોજનાનો લાભ મળશે. આ યોજના માટે ખેડૂતે કોઇ જ પ્રીમિયમ કે અન્ય કોઇપણ પ્રકારની નોંધણી ફી ભરવાની રહેશે નહીં.અનાવૃષ્ટિ-દુષ્કાળ-અતિવૃષ્ટિ-કમોસમી વરસાદ-માવઠું જેવા જોમખથી થતા પાક નુક્સાનને પણ આ યોજનામાં આવરી લેવામાં આવ્યા છે. ખરીફ ઋતુમાં થયેલ પાક નુકશાનની ટકાવારી 33 થી 60 ટકા હોયતો પ્રતિ હેક્ટર રૂ 20,000ની સહાય વધુમાં વધુ 4 હેક્ટરની મર્યાદામાં અપાશે. અને નુક્સાન 60 ટકાથી વધુ હોય તો પ્રતિ હેક્ટર રૂ 25,000 ની સહાય મહત્તમ 4 હેક્ટરની મર્યાદામાં અપાશે. વન અધિકારકાયદા હેઠળ સનદ ધરાવતા વનબંધુ ખેડૂતો પણ આ યોજનામાં આવરી લેવાયા છે.