નાસાએ એક્સિઓમ-4 મિશન માટે નવી લોન્ચ તારીખ જાહેર કરી છે. ક્રૂ મેમ્બર્સ SPACEXના ફાલ્કન 9 રોકેટ પર નવા SPACEX ડ્રેગન અવકાશયાન પર આંતરરાષ્ટ્રીય અવકાશ મથક (ISS) જશે. આ મિશનનો હેતુ ગુરુવાર, 26 જૂને સાંજે 4:30 વાગ્યે (ભારતીય સમય) ISS સાથે ડોક કરવાનો છે. જેથી નાસાએ મંગળવારે જાહેરાત કરી કે, ભારતીય અવકાશયાત્રી ગ્રુપ કેપ્ટન શુભાંશુ શુક્લાનું આંતરરાષ્ટ્રીય અવકાશ મથક (ISS) માટે એક્સિઓમ-4 મિશન હવે 25 જૂને લોન્ચ કરવામાં આવશે. આ મિશન ભારત, હંગેરી અને પોલેન્ડ માટે અવકાશમાં વાપસીનું પ્રતીક છે.

ભારતે ઓર્ગેનાઇઝેશન ઓફ ઇસ્લામિક કોઓપરેશન (OIC) દ્વારા કરવામાં આવેલી ભારત વિરોધી ટિપ્પણીઓને ફગાવી દેતાં તે તથ્યવિહોણી હોવાનું ગણાવ્યું છે. વિદેશ મંત્રાલયે સ્પષ્ટપણે કહ્યું કે, OICને  ભારતની આંતરિક બાબતો અને ખાસ કરીને જમ્મૂ- કાશ્મીર મુદ્દે ટિપ્પણી કરવાનો કોઇ અધિકાર નથી. વિદેશ મંત્રાલયે કહ્યું કે, આ ટિપ્પણીઓ પાકિસ્તાન દ્વારા પ્રેરિત છે. પાકિસ્તાન આતંકવાદને પોતાના રાજકારણનો ભાગ બનાવી ચૂક્યું છે. OIC મંચનો આ રાહે દુરઉપયોગ થઇ રહ્યો છે. ભારતે કહ્યું કે, OIC પાકિસ્તાનમાં પેદા થતા આતંકવાદના વાસ્તવિક ખતરાને નજરઅંદાજ કરે છે. પહલગામ આતંકવાદી હુમલા વખતે તે વાત સ્પષ્ટપણે બહાર આવી છે.

ઇંગ્લેન્ડમાં લીડ્સના હેડિંગ્લે ખાતે ભારત અને ઇંગ્લેન્ડ વચ્ચે રમાઇ રહેલી એડિસન-તેંડૂલકર ટ્રોફી માટેની પ્રથમ ટેસ્ટ મેચમાં મુકાબલો રોમાંચક બની ચુક્યો છે. ભારતે ઇંગ્લેન્ડને જીત માટે 371 રનનો લક્ષ્યાંક આપ્યો છે. ચોથા દિવસે રમત પુરી થતા ઇંગ્લેન્ડે બીજી ઇંનિંગમાં કોઇ વિકેટ ગુમાવ્યા વિના 21 રન બનાવ્યા હતા. ઇંગ્લેન્ડની ટીમ જીતથી 350 રન દૂર છે. જેક ક્રોલી 12 અને બેન ડકેટ 9 રન પર અણનમ છે. આજના દિવસની રમત બપોરે સાડાત્રણ વાગ્યાથી શરૂ થશે. આ પહેલાં ભારતની બીજી ઇનિંગમાં કે.એલ.રાહુલે 137 રન અને ઋષભ પંતે 118 રન બનાવીને સદી ફટકારી હતી.

ભારતની કેવી રહી ઇનિંગ ?

ગુજરાતમાં ચોમાસું સક્રિય થઈ ગયું છે. તેમાંય દક્ષિણ ગુજરાતમાં મેઘરાજાએ ધબધબાટી બોલાવી છે. રાજયમાં  છેલ્લા 24 કલાકમાં 163 તાલુકામાં નોંધપાત્ર વરસાદ નોંધાયો છે. સુરત શહેરમાં સૌથી વધુ 13.6 ઇંચ વરસાદ નોંધાયો છે, તો કામરેજમાં 10.7, પલસાણામાં 8.2, બારડોલીમાં 6.6 ઇંચ વરસાદ નોંધાયો છે.  સુરત શહેરમાં આજે પણ વરસાદી માહોલ વચ્ચે સવારની શાળાઓ બંધ રાખવામાં આવી છે, તો હવામાન વિભાગે આજે રાજયમાં દાહોદ, વડોદરા, છોટાઉદેપુર સહિત મધ્ય ગુજરાત તેમજ સૌરાષ્ટ્રમાં વરસાદનું ઓરેન્જ એલર્ટ આપ્યું છે અને ઉત્તર ગુજરાત તેમજ સૌરાષ્ટ્રના બોટાદ, ગીર સોમનાથ, જૂનાગઢ અને પોરબંદર સહિતના જિલ્લાઓમાં યલો એલર્ટ આપ્યું છે.

ઇઝરાયલ અને ઇરાન વચ્ચે ચાલી રહેલા યુદ્ધ પર પુર્ણવિરામ મુકાય તેવા સંકેત છે. અમેરિકી  પ્રમુખ ડોનાલ્ડ ટ્રમ્પે ગઇ રાતે બંને દેશો વચ્ચે સીઝફાયર મુદ્દે સહમતી સંધાઈ હોવાની જાહેરાત  કરી હતી. પોતાના સોશિયલ મીડિયા પ્લેટફોર્મ ટ્રુથ સોસિયલ પર ટ્રમ્પે દાવો કર્યો હતો કે, ઇઝરાયલ અને ઇરાન વચ્ચે પુર્ણ સીઝફાયરને મુદ્દે સૈધાંતિક સહમતી સંધાઈ ચુકી છે. ટ્રમ્પે સૌને તે બદલ અભિનંદન આપ્યા હતા. ટ્રમ્પે કહ્યું  કે, છ કલાકની અંદર પુર્ણ અને સમગ્ર શસ્સ્રવિરામનો  અમલ શરૂ થઇ જશે .આરંભિક 12 કલાક સુધી ઇરાન સંઘર્ષ વિરામનું પાલન કરશે. તે પછી ઇઝરાયલ પાલન કરશે. 24  કલાક પછી આ સંઘર્ષ સમાપ્ત માનવામાં આવશે.

ઈરાને સોમવારે ઈરાક અને કતારમાં આવેલા અમેરિકી લશ્કરી ઠેકાણાઓ પર છ મિસાઈલો છોડી, જેનાથી ઈઝરાયલ સાથેનો તેમનો સંઘર્ષ વધુ વધ્યો. આ હુમલાઓ રવિવારે વહેલી સવારે તેહરાન પર અમેરિકાના હુમલાના બદલામાં કરવામાં આવ્યા હતા. આ દરમિયાન, કતારે જાહેરાત કરી કે તે ઈરાની હુમલાનો સીધો જવાબ આપવાનો અધિકાર પણ અનામત રાખે છે. 

અમે આ હુમલાને સાર્વભૌમત્વ, આંતરરાષ્ટ્રીય કાયદા અને UN ચાર્ટરનું ઘોર ઉલ્લંઘન માનીએ છીએ: કતાર

ઈરાન-ઇઝરાયેલ સંઘર્ષ વચ્ચે કેન્દ્ર સરકારે પોતાના નાગરિકોની સુરક્ષાને પ્રાથમિકતા આપી છે. ભારત સરકારે પોતાના નાગરિકોની સુરક્ષિત વતન વાપસી માટે 'ઓપરેશન સિંધુ' શરૂ કર્યું છે. આ અભિયાન હેઠળ, ઈરાન અને ઈઝરાયલમાં ફસાયેલા ભારતીયોને સુરક્ષિત રીતે તેમના વતન પરત લાવવામાં આવી રહ્યા છે. 

ભારતીય નાગરિકો ઈરાનથી સુરક્ષિત રીતે ભારત પરત ફર્યા

ત્યારે રાજ્યમાં સાર્વત્રિક વરસાદના પરિણામે અમરેલી જિલ્લાના ધાતરવાડી અને સુરજવાડી, સુરેન્દ્રનગરના વાંસલ, લીમ-ભોગાવો-1 અને સબુરી, જામગનર જિલ્લાના વાઘડીયા, કચ્છના કલાઘોઘા, ભાવનગરના રોજકી તથા બગડ અને બોટાદ જિલ્લાના ભીમદાદ  એમ કુલ 10 જળાશયો સંપૂર્ણ એટલે કે  100 ટકા ભરાયા છે જેથી હાઈ એલર્ટ જાહેર કરવામાં આવ્યું છે. આ ઉપરાંત  29 જળાશયો  70 થી 100 ટકા વચ્ચે ભરાતા એલર્ટ અને વોર્નિંગ જાહેર કરવામાં આવી છે તેમ, જળ સંપત્તિ વિભાગ ગાંધીનગરની યાદીમાં જણાવાયું છે. 

જળ સંપત્તિ મંત્રી કુંવરજી બાવળીયાએ જણાવ્યું હતું કે, મુખ્યમંત્રી ભૂપેન્દ્ર પટેલના માર્ગદર્શનમાં વર્ષ 2024 -25 માં જળ સંપત્તિ વિભાગની યાંત્રિક પાંખ દ્વારા રૂ. 18.61  કરોડથી વધુના ખર્ચે વિવિધ પ્રકારની મશિનરી અને વાહનોની ખરીદી કરવામાં આવી છે.

કડી અને વિસાવદર પેટાચૂંટણીના પરિણામ ચિત્ર સ્પષ્ટ થઈ ગયું છે. મત ગણતરીના અંતિમ તબક્કા બાદ કડીની પેટાચૂંટણીમાં કમળ ખિલ્યું છે. ભાજપના ઉમેદવાર રાજેન્દ્ર ચાવડા 39,047 મતથી વિજયી થયા છે. જ્યારે કોંગ્રેસના રમેશ ચાવડાની હાર થઈ છે. ભાજપના કાર્યકરોમાં ઉત્સાહનો માહોલ જોવા મળી રહ્યો છે. કાર્યકરોએ રામધૂન અને ભજન ગાઇને ખુશી વ્યક્ત કરી છે. વિસાવદર ચૂંટણીમાં AAPના ઉમેદવાર ગોપાલ ઇટાલિયાએ જીત સુનિશ્ચિત કરી છે.  વિસાવદરમાં ભાજપના ઉમેદવાર કિરીટ પટેલ , કોંગ્રેસના નીતિન રાણપરિયા અને ગોપાલ ઇટાલિયા વચ્ચે ત્રિપાંખિયો જંગ જામ્યો હતો. જેમાં અંતે AAPના ગોપાલ ઇટલીયાએ જીત સુનિશ્ચિત કરી છે.